ການລົງທຶນ ໃນຂະແໜງກະສິກຳ ແລະ ປ່າໄມ້ ຢ່າງມີຄວາມຮັບຜິດຊອບ: ຈະສ້າງກົນໄກການ ແກ້ໄຂຄຳຮ້ອງທຸກ ຂອງບໍລິສັດແນວໃດ?

ການລົງທຶນໃນຂົງເຂດທີ່ດິນ ແລະ ຊັບພະຍາກອນທຳມະຊາດ ມັກຈະເຮັດໃຫ້ເກີດມີຂໍ້ຂັດແຍ່ງທາງດ້ານສັງຄົມ. ຖ້າຂໍ້ຂັດແຍ່ງ ເຫຼົ່ານັ້ນບໍ່ໄດ້ຮັບການແກ້ໄຂຢ່າງເໝາະສົມ ຈະບໍ່ພຽງແຕ່ສ້າງຜົນກະທົບຕໍ່ຊີວິດການເປັນຢູ່ຂອງຊຸມຊົນທ້ອງຖິ່ນເທົ່ານັ້ນ ແຕ່ຍັງຈະ ເຮັດໃຫ້ຄວາມສຳເລັດໃນການດຳເນີນທຸລະກິດມີຄວາມສ່ຽງໄປນຳ. ຜູ້ລົງທຶນອາດຈະປະເຊີນກັບການສູນເສຍທາງດ້ານງົບປະມານ ແລະ ຄວາມເສຍຫາຍຕໍ່ຊື່ສຽງ. ໂດຍອີງຕາມມາດຕະຖານສາກົນແລ້ວ ບັນດາບໍລິສັດ ມີຄວາມຈຳເປັນຕ້ອງມີກົນໄກການແກ້ໄຂ ຄໍາຮ້ອງທຸກທີ່ມີປະສິດທິພາບ ແລະ ສະໜອງກົນໄກການແກ້ໄຂບັນຫາທີ່ເກີດຂຶ້ນໃນເວລາດຳເນີນການລົງທຶນ ເປັນຕົ້ນແມ່ນຜົນ ກະທົບຂອງໂຄງການລົງທຶນ ທີ່ອາດຈະເກີດຂຶ້ນຕໍ່ສິ່ງແວດລ້ອມ ແລະ ສັງຄົມ. ຢູ່ໃນ ສປປ ລາວ, ກໍ່ໄດ້ມີບາງຕົວຢ່າງ ໃນການ ລິເລີ່ມນຳໃຊ້ກົນໄກການແກ້ໄຂຄຳຮ້ອງທຸກພາຍໃນຂອງບໍລິສັດເອງແລ້ວ. ເຊິ່ງມັນອາດຈະເປັນການລິເລີ່ມ ແລະ ເປັນແບບຢ່າງທີ່ ດີ ເພື່ອໃຫ້ຫຼາຍບໍລິສັດໄດ້ນຳໄປເປັນແບບຢ່າງໃນການຈັດຕັ້ງປະຕິບັດ. ປື້ມຄູ່ມືນີ້ ມີຈຸດປະ ສົງເພື່ອຊ່ວຍໃຫ້ຜູ້ລົງທຶນເຂົ້າໃຈເຖິງ ຄວາມຄາດຫວັງຂອງເຂົາເຈົ້າ ໃນການຄຸ້ມຄອງຄຳຮ້ອງທຸກ ແລະ ຜູ້ລົງທຶນສາມາດປະຕິ ບັດເພື່ອການບັນລຸເປົ້າໝາຍດັ່ງກ່າວ.